قبل ما تتفق على موقع، اكتب هدفه وزبونك والفرق اللي بتقدّمه ودليل الثقة وخطوة التواصل من الموبايل. نموذج الأسئلة الخمسة بجمع هالقرارات بموجز واضح تناقشه مع المصمّم.
النموذج لأصحاب المشاريع اللي عم يجهّزوا لموقع جديد أو لتعديل موقعهم الحالي. بيبدأ بهدف الموقع والزبون، وبوصل للخطوة اللي بده يعملها من الموبايل.
في كل سؤال مثال افتراضي ومساحة تكتب فيها. وبالآخر، صفحة بتجمع قراراتك وقائمة تراجعها قبل الاتفاق على التنفيذ.
إعداد أحمد رصاص · 15 نوفمبر 2026 · الإصدار 1.0
خمسة أسئلة. كل جواب إله مكان بالموقع.
01
شو بدك الزائر يعمل؟
اختار خطوة أساسية تناسب مشروعك: يحجز، يشتري، أو يطلب عرض سعر. سمّي الفعل ووضّح وين بوصل الزائر بعده.
شوف مثال يساعدك تجاوب
مثال افتراضي لورشة عناية بالسيارات: الزائر يطلب موعد تلميع على واتساب. الموظف يراجع نوع السيارة والوقت، وبعدين يأكّد الموعد. إرسال الطلب لحاله مش حجز مؤكّد.
02
مين زبونك، وشو بده يعرف؟
اختار زبون لخدمة محدّدة. اكتب شو جابه للموقع، وشو المعلومات اللي بتساعده يقرّر قبل ما يتواصل.
شوف مثال يساعدك تجاوب
بنفس المثال الافتراضي: صاحب سيارة بعمّان بده تلميع، وعم يقارن بين الورش. بده يعرف شو بتشمل الخدمة، كم بتاخد وقت، وكيف بيتحدّد السعر، ووين الورشة.
03
ليش يختار مشروعك؟
اكتب فرق ملموس بتقدر تشرحه وتلتزم فيه. ممكن يكون نطاق خدمة واضح، طريقة شغل محدّدة، أو تخصّص فعلي. عبارة «أفضل جودة» لحالها ما بتشرح الفرق.
شوف مثال يساعدك تجاوب
صياغة افتراضية، تُستخدم إذا كانت صحيحة: قبل التلميع، بنفحص الدهان معك وبنحدّد الخدمة المناسبة. بنعطيك قائمة مكتوبة باللي بتشمله الخدمة قبل ما نبدأ.
04
شو عندك يخلّيه يثق؟
اجمع دليل حقيقي مرتبط بالخدمة: صور شغلك، أمثلة مشاريع، أو تقييم عندك إذن تنشره. حدّد مصدر كل دليل، ومين براجع دقّته وحق استخدامه.
شوف مثال يساعدك تجاوب
تجهيز افتراضي للورشة: اختيار صور قبل وبعد لنفس السيارة، توضيح الخدمة اللي انعملت، والحصول على إذن صاحبها. المثال بيوضّح المطلوب؛ مش شهادة عميل أو نتيجة من شغل رصاص.
05
شو الخطوة الجاية، خصوصًا عالموبايل؟
اكتب مسار الزائر من لحظة اقتناعه لحد إرسال الطلب. اختار اسم زر مفهوم، وحدّد المعلومات الضرورية والرسالة اللي بتظهر بعد الإرسال.
شوف مثال يساعدك تجاوب
مسار افتراضي: زر «اطلب موعد تلميع» يفتح واتساب برسالة عن نوع الخدمة والسيارة والوقت المناسب. بعدها بيرد الموظف لتأكيد المتاح. الرسالة الجاهزة ما بتنبعت تلقائيًا.
عبّي النموذج. وبعدين لخّصه.
جاوب عن كل سؤال من واقع مشروعك. استخدم الأمثلة كطريقة تفكير.
اكتب «بحاجة لتأكيد» عند أي معلومة ناقصة، وحدّد مين بجهّزها.
انقل الخلاصة لصفحة الموجز، وراجعها مع المصمّم قبل طلب السعر النهائي.
بتفضّل تكتب عالموبايل أو الكمبيوتر؟ نزّل القالب النصّي وافتحه بتطبيق الملاحظات أو بأي محرّر نصوص.